淇哥於40年前已證實患上腸癌，接受過手術治療，在醫院休養期間，他見過一位患有胃癌的病人，前一刻還清清醒醒，下一刻卻突然暈倒在地上，不省人事，翌日更離世了，這件事令他非常震驚，一直深刻地記在腦海中，畢生難忘。

其後，他不幸地因為患有胃癌，又需要進入醫院接受手術，切除整個胃部。承受病痛的同時，多次進出醫院的經驗，令他意識到「自己條命自己渣拂」。淇哥講述：「有一次喺醫院住咗十日，病房病人輪住死，非常痛苦，成間病房氣氛都好緊張，醫護人員呢邊問病人仲有咩家屬未見，另一邊又幫第二個病人打強心針，好像死又唔俾佢死，好悽慘。」那次的體會印象深刻，因而令他萌生「身體係我嘅，由我話事」的信念。

之後有一次，淇哥偶爾在電視上看見「預設醫療指示」的介紹，這時他恍然大悟，認為自己需要及早考慮在「三長兩短」時是否施行搶救的意願。於是，他便將想法告訴兒子，並要求安辭服務能為他安排簽署「預設醫療指示」文件。2017年6月，淇哥在醫管局的外展醫生、家人和安辭服務職員的見證下，終於簽訂了指示。

社工：當您經歷過咁多次出入醫院，見到有病人有不同的危急情況，您有咩感受？「預設醫療指示」又可以為您帶來咩改變？

淇哥：如果有「預設醫療指示」嘅話，我就可以話事，當我見哂想見啲人，我就可以安心地、自然地離世，唔使勉強吊住條命。

社工：您點睇維生治療？

淇哥：打強心針只喺幫病人抖多幾啖氣，咪搞！插鼻胃喉，唔好搞！心肺復甦術，都唔使！一切順其自然，只要醫生認為可以救就救，病情逆轉唔到就無謂搞喇！

想法豁達的淇哥，一直強調為自己的身體作主，不想再受無謂的痛苦，也不想加重兒女的負擔。我們亦訪問了淇哥的兒子，嘗試了解家人對淇哥決定的看法。

社工：當聽到爸爸要訂立「預設醫療指示」時，您嘅心情係點？

淇哥兒子：我第一次聽「預設醫療指示」呢樣嘢，係爸爸話我知的。坦白講，理性同感情上有時真係好難平衡。理性和客觀上，佢做手術切咗個胃，又成日好痛，好辛苦，代入佢角度睇，訂立「醫療指示」係好事，唔駛佢咁痛苦；但另一方面，在情感上，作為佢個仔，總會唔捨得，好想見佢耐啲時間。但見到爸爸堅持，最終我都會接受，尊重佢意思。

面對病人的選擇，家人的確會感到左右為難，不想父親承受痛苦之外，又不忍心將自己的意願強加於爸爸身上。結果，兒子還是尊重爸爸的意願，同意淇哥簽訂「預設醫療指示」。

在人生的最後階段，病人和家人實在更需要多加溝通，一同商討有關晚期照顧或其他後事的安排，減少各人的迷惘和不安，最終達至善終，這就是病人和家屬最希望得到的事。